Fréttir

Ljótu hálfvitarnir ljúka starfsárinu með tónleikum í Miðgarði föstudaginn 19. september næstkomandi. „Fyrir vikið stefnir hljómsveitin á að hækka í botn og skrúfa vel frá öllum fíflalátakrönum,“ segir í fréttatilkynningu frá hálfvitunum. „Staðarvalið er vel við hæfi. Það er alltaf tilhlökkun í hálfvitarútunni þegar keyrt er í Miðgarð. Þar er gott að spila og oft myndast ólýsanleg stemming, eða allavega stemming sem óráðlegt er að lýsa í smáatriðum í opinberum fjölmiðli. Fólk verður bara að vera þarna sjálft,“ segir í tilkynningunni. Tónleikarnir hefjast kl: 21.00 og forsala miða er á N1 Sauðárkróki og í KS Varmahlíð. Miðar verða einnig seldir við innganginn.

Eftir ættarmót og fjölskyldusamkomur sumarsins er komið að söngveislu á efri hæðinni. Kvennakórinn Sóldís og Drengjakór íslenska lýðveldisins ætla að syngja og skemmta í Menningarhúsinu Miðgarði föstudagskvöldið 8. ágúst kl. 20:30. Miðaverð er 1.500 kr. Söngstjóri kóranna er Sólveig S. Einarsdóttir og undirleikari er Rögnvaldur Valbergsson og e.t.v. fleiri. Hlökkum til að sjá sem flesta!